Durante as campañas arqueolóxicas realizadas entre os anos 1982 e 1988 exhumáronse máis de tres mil fragmentos cerámicos. Deles, só o 29% permiten identificar as formas dos vasos orixinais. A cerámica documentada é semellante á atopada noutros castros da zona (Novás, San Millao, Muro da Pastoria en Chaves, etc.), con olas de cociña, recipientes de almacenaxe de grandes dimensións, vasos para o consumo de líquidos, pratos, cuncas, vasos piriformes, potes de orellas perforadas, fontes de asas interiores, etc. todos eles modelados a man ou a torno e cunha decoración simple.